काठमाडौ। बेनीघाट–रोराङ गाउँपालिकामा निर्माण गरिएको प्रमुख प्रशासकीय भवनको आज एक विशेष समारोहका बीच पूर्वप्रधानमन्त्री तथा नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले उद्घाटन गरेका छन् । नयाँ भवन सञ्चालनमा आएसँगै गाउँपालिकामा प्रशासनिक सेवा प्रवाह अझ व्यवस्थित, आधुनिक र प्रभावकारी हुने अपेक्षा गरिएको छ।
उद्घाटन समारोहमा स्थानीय जनप्रतिनिधि, विभिन्न दलका नेता, कर्मचारी, सुरक्षा निकायका प्रतिनिधि तथा स्थानीय बासिन्दाको उल्लेखनीय उपस्थिति थियो। प्रमुख अतिथिका रूपमा सम्बोधन गर्दै प्रचण्डले स्थानीय तह देशको विकासको मेरुदण्ड भएको उल्लेख गर्दै, “अब गाउँपालिकाहरूले अझ धेरै प्रभावकारी र उदाहरणीय काम गरेर जनताले प्रत्यक्ष परिवर्तन अनुभूत गर्नुपर्छ” भन्ने बताए ।
गाउँपालिका अध्यक्ष कृष्णबहादुर थपलिया ‘विवेक’ले बेनीघाट–रोराङ गाउँपालिकाले जनताले गाउँमै सिंहदरबार आएको अनुभूति हुनेगरी सेवा तथा विकासका कामलाई अगाडि बढाइरहेको बताउँदै, परिवर्तनका धेरै योजनाहरू कार्यान्वयनका क्रममा रहेको जानकारी दिए।
नयाँ प्रमुख प्रशासकीय भवनमा अत्याधुनिक सुविधासहित प्रशासनिक कार्यालय, अभिलेख कक्ष, बैठक हल, सेवा केन्द्र तथा नागरिकमैत्री सुविधा समावेश गरिएको छ। भवन सञ्चालनमा आएपछि स्थानीयले दैनिक प्राप्त गर्ने सामाजिक तथा प्रशासनिक सेवामा पारदर्शिता, छरितोपना र सहजता बढ्ने अपेक्षा गरिएको छ।
लामो प्रतीक्षापछि गाउँपालिकाले पूर्ण संरचना पाएको भन्दै स्थानीयवासीहरू खुसी देखिएका छन्। विगतमा भवन अभावले सेवाग्राहीलाई असहजता हुने गरेकोमा अब एउटै छानामुनि सबै सेवा उपलब्ध हुने भएकाले गाउँमै सुविधाजनक सेवा पाउने आशा राखिएको छ।
उद्घाटनसँगै बेनीघाट–रोराङ गाउँपालिकाले आगामी दिनमा सूचना–प्रविधिमैत्री सेवा प्रवाह, स्थानीय पूर्वाधार विस्तार तथा समग्र विकास कार्यलाई थप सुदृढरूपमा अगाडि बढाउने प्रतिबद्धता जनाएको छ।
प्रतिक्रिया