सिन्धुलीको आगामी निर्वाचन यतिबेला निकै रोचक र त्रिपक्षीय प्रतिस्पर्धाको मोडमा पुगेको छ, जहाँ विकासप्रेमी नेताका रूपमा स्थापित नेकपा एमालेका प्रदिप कटुवाल, राष्ट्रिय स्वतन्त्र पार्टीका धनेन्द्र कार्की र उज्ज्वल बरालबीच कडा भिडन्त हुने देखिएको छ।
विशेष गरी सिन्धुलीको चुनावी मैदानमा अहिले एमालेका प्रदिप कटुवाल र स्वतन्त्र तथा जनप्रिय छवि बनाएका उज्ज्वल बरालबीचको टक्कर मुख्य चर्चाको विषय बनेको छ। एकातिर एमालेको बलियो सांगठनिक शक्ति र स्थापित राजनीतिक विरासतसहित प्रदिप कटुवाल मैदानमा उत्रिएका छन् भने अर्कोतिर “भुइँ मान्छेको नेता” मानिने उज्ज्वल बरालले जिल्लाको सडक, शिक्षा र पूर्वाधार विकासमा पुर्याएको अतुलनीय योगदानका कारण आम जनताको मन जित्न सफल भएका छन्।
बरालको सक्रियताले सिन्धुलीका दुर्गम बस्तीदेखि शहरसम्म एउटा नयाँ आशा जगाएको छ, जसले गर्दा परम्परागत पार्टीका किल्लाहरूमा समेत हलचल पैदा भएको छ। यसैबीच, राष्ट्रिय स्वतन्त्र पार्टी (रास्वपा) बाट धनेन्द्र कार्कीले पनि नयाँ शक्तिको रूपमा आफ्नो उपस्थिति बलियो बनाउन खोजिरहेका छन्, जसले परिवर्तन चाहने केही मतहरू तान्न सक्ने देखिन्छ।
तर, ग्राउन्ड स्तरको वास्तविक अवस्था हेर्दा मुख्य प्रतिस्पर्धा प्रदिप र उज्ज्वलकै बीचमा केन्द्रित भएको स्थानीय राजनीतिक विश्लेषकहरूको ठम्याइ छ। परम्परागत पार्टीको विरासत र संगठनको बलमा चुनाव जित्ने दाउमा रहेका कटुवाललाई विकास र समृद्धिको स्पष्ट सोच बोकेका बरालले हरेक मोर्चामा कडा चुनौती दिइरहेका छन्। विशेषगरी पूर्वी सिन्धुलीको शैक्षिक विकास, यातायात सुधार र स्थानीय समस्या समाधानमा बरालले खेलेको निःस्वार्थ र सक्रिय भूमिकाले उनलाई तटस्थ मतदाता, बौद्धिक वर्ग र युवाहरूको पहिलो रोजाइ बनाएको छ।
बरालको बढ्दो लोकप्रियता र जनलहरले गर्दा यसपटक सिन्धुलीमा ‘काम गर्ने कि कुरा गर्ने’ भन्ने बहसले प्राथमिकता पाएको छ। सादा जीवनशैली र सरल व्यवहारका धनी बरालले कुनै शक्ति प्रदर्शन नगरी केवल आफ्नो कर्ममार्फत जनताको मनमा घर बनाएका छन्। उता, एमालेका कटुवाल आफ्नो सांगठनिक मत सुरक्षित राख्न प्रयासरत रहँदा बरालले भने दलीय घेराभन्दा बाहिरका आम नागरिकको समर्थन बटुलिरहेका छन्।
यसरी हेर्दा, एमालेको दह्रो संगठन र उज्ज्वल बरालप्रति उर्लिएको स्वतःस्फूर्त जनलहर बीचको यो महासंग्रामले सिन्धुलीको राजनीतिमा नयाँ र ऐतिहासिक मोड ल्याउने निश्चित देखिएको छ। जनताले अब आश्वासन होइन, उज्ज्वल बराल जस्तै परिणाममुखी नेतृत्व खोजिरहेकाले यसपटकको प्रतिस्पर्धा निकै कडा र निर्णायक हुने संकेत मिलेको छ।
प्रतिक्रिया