सुर्खेतमा ब्राउन सुगर सहित एक जना पक्राउ

सरस्वती बुढा, सुर्खेत

सुर्खेत वीरेन्द्रनगर नगरपालिका–३ स्थित क्षेत्रमा प्रहरीले लागुऔषध (ब्राउन सुगर) सहित एक जनालाई पक्राउ गरेको छ । सोमबार गुप्त सूचनाको आधारमा संयुक्त प्रहरी टोलीले गरेको अपरेशनमा लागुऔषध कारोबारमा संलग्न रहेको आशंकामा एक जना युवक पक्राउ परेका हुन् ।

गोप्य सूचनाका आधारमा लागुऔषध नियन्त्रण शाखा कार्यालय सुर्खेत र जिल्ला प्रहरी कार्यालय सुर्खेतबाट खटिएको संयुक्त टोलीले उक्त युवकलाई पक्राउ गरेको प्रहरीले जनाएको छ ।

प्रहरीका अनुसार पक्राउ परेका व्यक्ति बाँके जिल्ला, खजुरा गाउँपालिका–८ स्थायी घर भई हाल सुर्खेत वीरेन्द्रनगर नगरपालिका–३ बसोबास गर्दै आएका २३ वर्षीय सद्दाम हुसेन हुन् ।

प्रहरीले दिएको जानकारीअनुसार हुसेनलाई शंकास्पद अवस्थामै फेला पारी शारीरिक जाँच तथा घर खानतलासी गर्दा उनको साथबाट करिब २ ग्राम ६५० मिलिग्राम (२.६५ ग्राम) लागुऔषध ब्राउन सुगर बरामद भएको हो ।

बरामद गरिएको लागुऔषधसहित उनलाई नियन्त्रणमा लिएर जिल्ला प्रहरी कार्यालय सुर्खेतमा ल्याइएको छ । प्रहरीका अनुसार घटनाबारे थप अनुसन्धान भइरहेको र लागुऔषध ऐन अन्तर्गत मुद्दा दर्ता गरी कानुनी कारबाही अघि बढाइएको छ ।

प्रहरीले सुर्खेत क्षेत्रमा पछिल्लो समय बढ्दो लागुऔषध कारोबारलाई नियन्त्रण गर्न विशेष अपरेशन सञ्चालन गर्दै आएको जनाएको छ । प्रहरीले सर्वसाधारणलाई लागुऔषध सम्बन्धी जानकारी दिनुका साथै शंका लाग्ने गतिविधि देखिएमा तत्काल सूचित गर्न आग्रह समेत गरेको छ ।