काठमाडौं । प्रधानमन्त्री बालेन शाह नेतृत्वको सरकारमा सुधन गुरूङ गृहमन्त्री नियुक्त भएका छन् । गृहमन्त्री चयन प्रक्रिया अन्तिम समयसम्म विवादमा रहे पनि प्रधानमन्त्रीको अडानपछि गुरूङको नाममा सहमति जुटेको हो ।
स्रोतका अनुसार राष्ट्रिय स्वतन्त्र पार्टीभित्र सुरुवाती रूपमा गृहमन्त्रीका लागि उपसभापति डोलप्रसाद अर्याल र महामन्त्री सुनिल लम्साल को नाम चर्चामा थियो । पार्टी सभापति रवि लामिछाने ले अर्याललाई नै गृहमन्त्री बनाउन चाहेका थिए ।
तर प्रधानमन्त्री शाह भने सुरुदेखि नै लम्साल वा गुरूङमध्ये एकलाई गृहमन्त्री बनाउनुपर्ने पक्षमा थिए । प्रारम्भमा लम्सालको नाम अगाडि सारिए पनि सहमति जुट्न नसकेपछि गुरूङको नाममा छलफल भएको बताइएको छ ।
बिहीबार बेलुकी भएको छलफलमा प्रधानमन्त्री शाहले गुरूङकै पक्षमा अडान लिएपछि अन्ततः उनको नाममा सहमति जुटेको स्रोतले जनाएको छ । जेनजी आन्दोलनको भावना समेट्न गुरूङ उपयुक्त हुने प्रधानमन्त्रीको तर्क रहेको थियो ।
गोरखा–१ बाट निर्वाचित गुरूङ जेनजी आन्दोलनका अगुवामध्ये एक मानिन्छन् । उनी ‘हामी नेपाल’ का संस्थापक अध्यक्षसमेत हुन् र २०७२ को भूकम्पपछि सामाजिक काममा सक्रिय रहँदै आएका छन् ।
गृहमन्त्री नियुक्तिसँगै उपसभापति अर्याललाई सभामुख बनाउने समझदारी भएको छ । यस्तै, कविन्द्र बुर्लाकोटी मुख्य सचेतक र निशा डाँगी सचेतक बन्ने तयारी भएको छ ।
यसअघि गृहमन्त्रीको चर्चामा रहेका लम्साल भौतिक पूर्वाधार तथा सहरी विकास मन्त्री बनेका छन् । स्ट्रक्चरल इन्जिनियर रहेका लम्साल पूर्वाधार विकासमा विज्ञ मानिन्छन् ।
प्रतिक्रिया